香港故宮文化博物館 | 古今無界──故宮文化再詮釋

7001. 《慶》

你好！我係梁基爵，大家眼前嘅作品叫做《慶》。《慶》係一個包含31聲道嘅聲音裝置，靈感來自展廳一「紫禁萬象」所展出嘅宮廷樂器「鎛鐘」同「特磬」。呢兩件樂器意義重大，「鎛鐘」通常用喺音樂嘅開始，而「特磬」就出現喺結尾，係中和韶樂嘅重要組成部分。就咁睇，好似樂器本身就已經象徵咗音樂嘅結構。呢種固有嘅想像啟發咗《慶》嘅誕生。

製作初期，為咗營造慶典嘅氣氛，我決定選用紅同金作為作品嘅主色調，視覺上帶出富麗堂皇嘅感覺。之後，我揀咗一段過去香港煙花匯演嘅音頻，用氣球嘅爆破聲以配音形式導入，加上唔同嘅演奏技巧，令氣球聲變成煙花一樣嘅慶典音樂。最後，而家大家聽到嘅其實只有氣球嘅聲音。不過借助住作品嘅空間設計、音響設備同埋嶄新嘅音樂排列，就變成咗一場獨一無二嘅煙花匯演，衝擊大家對聲音一向嘅固有意象同埋想像。

7002. 《浪書》

大家好！我係張瀚謙，今次創作嘅藝術裝置叫《浪書》。呢個作品係向展廳八「國之瑰寶」開幕專題展裡面，元代鄧文原嘅章草《急就章》致敬。我訓練機械臂去書寫文中1,394個字，俾觀眾以嶄新嘅角度感受書法嘅節奏同埋力度。

《浪書》作為一個新嘅書體，係想探索未來書法嘅可能性、仲有演繹方法同埋書寫平台。 《浪書》嘅「浪」字，就好似海浪一樣嘅腦電波，引領大家思考係未來溝通時候，超越文字同埋以腦電波交流嘅大膽想法。所以大家睇到作品嘅動態軌跡，係好似一個圓形咁樣，實則其實係以360度去書寫文字，驟眼睇落去，就好似一個人嘅腦電波。希望大家係欣賞完我嘅作品之後，會對未來文字載體，同埋溝通嘅方法有新嘅思考。

7003. 《冥冥之鐘》

大家好！我係製作《冥冥之鐘》嘅陳家俊。呢個巨型機械裝置嘅靈感，係來自故宮博物院嘅鐘錶收藏。作品主要由兩部分組成：時計部分係一個多層結構嘅圓形，最上層同最中心，就係佢嘅機芯，而中層就係傳統嘅鐘錶結構；最外圍係由一組動態時標裝置組成；而佢嘅尾部係有兩列呈長條形狀嘅報時銅鐘。呢個時計，雖然有傳統鐘錶嘅擺輪同埋擒縱結構，但係佢嘅擺動並唔規則，有別於一般鐘錶所表現嘅「準時」，呢個時計反而呈現咗一種混沌嘅狀態。

我希望觀眾可以藉此一齊探索「混沌」呢一個概念。「混沌」係不可預測，但係又絕非隨機。一個混沌嘅系統，喺佢開始嘅一刻，其實已經注定咗佢之後嘅一切活動。你可以視佢為一種蝴蝶效應。所以呢件作品嘅名，就係叫做《冥冥之鐘》，取其「冥冥之中，自有主宰」嘅意思。

7004. 《見器物：觀大千》

大家好！我叫洪強。今次呢件藝術裝置作品叫做《見器物：觀大千》，我係想用三個層次去表現中國藝術繪畫入面嘅宇宙觀同埋時空觀嘅概念。

第一個層次，係「三遠」，探討傳統中國繪畫同藝術家如何突破平面嘅空間嘅限制，達到一個思想同想像力嘅馳騁。「三遠」係一個多視點嘅時空概念，分別係「高遠」、「深遠」同埋「平遠」，喺同一個畫面可以有唔同嘅視點來觀賞山水藝術。

第二個層次，係平行時空嘅概念。觀眾透過觀賞山水作品從而進入山水世界之中，究竟係我哋觀看山水入面嘅情境，定係山水入面嘅人透過入面嘅情境而望返出來呢？究竟邊個喺入面？而邊個喺出面呢？定係兩個嘅世界都係同一時間可以發生呢？

而第三個層次，係延伸中國繪畫嘅宇宙觀，從一種循環而非偶然性嘅概念，帶出萬事萬物，其實都係「無常」嘅。

7005. 《星垂平野》

你好，我叫許方華。我嘅作品叫《星垂平野》，命題靈感來自唐代詩人杜甫嘅詩〈旅夜書懷〉。 大家見到作品好似一個隧道，入口成方形， 出口就好似圓形。 呢個設計嘅靈感，正正來自於中國古代天圓地方嘅世界觀。故宮博物院嘅建築設計， 同星空天際有莫大嘅關係； 因此我希望我嘅作品從建築嘅角度與故宮作聯繫。

天圓地方呢一種宇宙觀，其實早喺宋朝已經應用於建築美學， 我哋可以喺宋代李誡嘅著作《營造法式》裏面得到印證。現今科學驗證之下，讓我地知道天地並非圓方，但係我更加好奇，喺天圓地方嘅宇宙之下，我哋睇到嘅星空，又係點樣嘅呢？

係隧道嘅入面， 我以三種唔同嘅方法去展現星空，目的係創造一個被星星環抱嘅宇宙空間。隧道嘅頂部，參考咗宋代天文學家蘇頌畢生研究所得嘅星圖。蘇頌以圓孔記錄星星既位置，所以隧道嘅頂部有7644 粒星星，以唔同嘅大小圓孔製成；另外我用咗238個迷你顯示屏，組成28個星宿，呢個星星連繫嘅方法，有別於西方星座，展現出古人對星空獨有嘅想像。而隧道嘅兩旁，以120,000粒現有嘅星星數據，編寫咗一個程式成為影像，投放於牆上。

希望大家在繁忙嘅生活當中，唔好忘記仰望星空。

7006. 《物化》

歡迎大家，我係吳子昆。我嘅作品《物化》位於展廳右邊盡頭一間比較暗嘅房間。係裏面大家會見到300幾件三維打印嘅物件，有啲掛係天花，高高低低咁排列，其他就用支架固定咗係地下。大家有冇覺得佢哋熟口熟面呢？佢哋嘅原型都係嚟自香港故宮文化博物館展出嘅文物。

我將呢啲文物簡化，去除顏色肌理，以及所有背景資料，例如名稱、年份、作者、歷史文化等等嘅客觀描述。希望還原文物作為一件物件嘅基本形態。好似係陳設方面，博物館一般會將文物獨立展示。而我今次就希望作品以一個群組嘅方式展出。唔再係觀眾圍繞住展品，而係展品圍繞住觀眾。

另外，靠牆嘅地方放咗五支電腦燈，係路軌上不停來回移動。帶領大家嘅視線游走呢個空間，去思考展品另外一層嘅意義。呢啲物件當初被創造嘅時候，曾經係預設左特定嘅功能，而今日係大部份嘅博物館嘅展示方式，大家又覺得佢哋成為咗一種咩嘅形態呢？再過幾百年之後，文物仲會唔會用到今日同樣嘅方式展出？